Feb 23, 2022 127times

Renyon avek ‘Lakademi Kreol Sesel’

Renyon avek ‘Lakademi Kreol Sesel’

Renyon avek ‘Lakademi Kreol Sesel’

Promot nou lalang maternel Kreol Seselwa

 Minis responsab pou Lanplwa ek Zafer Sosyal Madanm Patricia Francourt akonpannyen par manm egzekitif dan son Minister ki enkli Departman Lanplwa, Departman Sosyal e Lazans pou Proteksyon Sosyal ti rankontre dan en renyon avek Direkter Egzekitif Madanm Marie Flora BenDavid e son lekip sorti kot Lakademi Kreol Sesel (LKS) ki tonm anba parasol ‘’Lenstiti Nasyonal pour kiltir, Leritaz Ek Lar’’(SNICHA) Mardi le 15 Fevriye 2022.

 

Sa rankont ti en loportinite pou diskit plizyer pwen esansyel e idantifye bann pwen stratezi ki pou ed sa de lenstitisyon pou pli byen ekipe kan pe donn servis bann kliyan e ranforsi rezilyans ki anfen a reisi kapab konbat lefe COVID-19 konman en lekip.

 

Bann pwen prensipal se pou promot valer prodwi e servis an servan lalang maternel ki kreol seselwa kan pe fer biznes e sa se pou asire ki lenformasyon I ganny enkli dan lalang kreol seselwa kin ganny byen enterprete e ki pou fasil konpran kan I ariv ler pou enplimant lalwa e polisi. An menm tan tradwir bann lalwa e polisi ki an egzistans pou benefis bann kliyan.

 

Bann propozisyon ki ti ganny met devan se pou Minister Lanplwa ek Zafer Sosyal pou travay an kolaborasyon avek Lakademi Kreol Sesel kan pe planifye bann aktivite ki trouve lo kalandriye nasyonal, avek bi pou anmenn plis enklisivite e asir plis ki posib, partisipasyon tou sitwayen.

 

Sa rankont ti en premye pa dan sa demars. Pou konklir ti ganny agree ki bann swivi pou ganny fer separeman avek sak departman anba Minister Lanplwa ek Zafer Sosyal pou pli byen konpran zot bezwen partikilye ki ava ede dan planifikasyon pou le fitir.

Minis Francourt ti remersye Madanm BenDavid pou son linisyativ e osi afirm son sipor pou sa travay kolaborasyon ant le de lotorite.